最近美國國土安全部在社交媒體發布一段宣傳片，內容將小智捕捉寵物小精靈嘅動畫片段，同當地執法人員逮捕非法移民嘅畫面混剪埋一齊，甚至將被捕者大頭照製成Pokémon卡牌，引起Fans大為不滿，有人更呼籲任天堂同Pokémon公司應該採取法律行為，控告國土安全部侵權。

Gotta Catch ‘Em All. pic.twitter.com/qCvflkJGmB

— Homeland Security (@DHSgov) September 22, 2025

呢段長約一分鐘嘅影片，以美版《Pokémon》動畫初代主題曲《Gotta Catch‘Em All》作背景音樂，將美國移民和海關執法局（ICE）特工突擊逮捕移民嘅真實鏡頭，同Pokémon動畫中捕捉小精靈嘅經典場面交錯剪輯，又將被捕移民嘅相片製作成一系列偽Pokémon卡，標上罪名同國藉。明顯係將逮捕非法移民比喻為捕捉小精靈，用嚟宣傳佢哋嘅移民執法行動。

影片出街後隨即引起熱烈討論，唔少Pokémon Fans都覺得做法唔尊嚴原作，唔應該將兒童向嘅動漫同暴力逮捕畫面混埋一齊。有人甚至喺留言區標記任天堂同Pokémon公司，呼籲佢哋追究侵權責任。不過有關當局冇因此而刪除影片，國土安全部屬下嘅美國海關及邊境保衛局（CBP）更加入呢個「潮流」，喺留言區貼出一將比卡超動圖，稱其為「邊境巡邏隊嘅新成員」。

對此，Pokémon公司國際部（The Pokémon Company International）就透過聲明向傳媒《Variety》證實，佢哋完全冇參與呢段影片嘅製作，亦冇授權畀政府機構使用佢哋嘅知識產權：「我哋意注意到國土安全部最近發布咗一段嘅影片，入面有我哋品牌相關嘅圖像同語言。我哋公司並冇參與創作或發布呢個內容，亦冇授權使用我哋嘅知識產權。」不過就未有透露會否無採取法律行動。

曾任職Pokémon公司國際部首席法務官（CLO）嘅Don McGowan向《IGN》表示，考慮到公司行事一向低調、唔想捲入媒體輿論，再加上公司大多數高層係靠綠卡留喺美國，唔會想同美國政府硬碰，所以起訴機率好低。Don McGowan仲話，雖然自己已經係最衝動嘅CLO，但如果佢仲喺公司嘅話都唔願意掂呢件事，情願擱置唔理，等事情慢慢過去。