估唔到呢？事隔兩個幾月，美國科技公司CEO Andy Byron與「年上」下屬Kristin Cabot於Coldplay演唱會被Kiss Cam捕捉，結果婚外情醜聞被唱通街之事，竟然仲可以有後續！而且仲係劇情大反轉！事關有消息人士向傳媒爆料，演唱會當日，Kristin Cabot個老公Andrew Cabot原來都喺現場，換言之佢睇住自己老婆錫另一個男人；但你話佢會唔會好傷心呢？咁又未必喎，因為當日佢係約咗另一個女人一齊去！

圖片：Candybarr2009 on X

話說當日事發之後，Andy Byron及Kristin Cabot不僅一夜之間成為全球網民熱話，二人亦失去工作。當中Kristin Cabot自然難免被冠上水性揚花之類嘅批評。不過據《People》報導，自從本月初Kristin Cabot原配Andrew Cabot向媒體發放聲明，確認二人已經離婚，並希望「以體面方式結束各種揣測，並讓家人重獲重視的私隱」之後，就有Kristin Cabot方嘅知情人士主動聯絡媒體試圖「澄清」事件。

據呢位知情人士講，Kristin Cabot與Andy Bryon係工作上嘅好伙伴，私底下亦係朋友，但二人之間無婚外情。當日喺演唱會上同老細又攬釤固然不恰當，但Kristin亦為此負上全責，消息人士認為往後對Kristin嘅攻擊，以至無咗份工都係對Kristin唔公平嘅。

更重要嘅係，消息人士指出早於演唱會之前，Kristin Cabot就與老公Andrew Cabot進入分居，換言之二人嘅婚姻似乎已經名存實亡。消息人士甚至直指事發時Andrew Cabot唔係如大家推測一樣身在日本，而係身處同一場演唱會當中，而且仲係約會緊。換言之，假若消息人士講嘅係事實，「案發」當日Andrew Cabot係約咗另一女人去睇Coldplay演唱會，然後見到自己個分居老婆同老細又攬又鍚——究竟佢當時嘅心情係點呢？

不過無論Kristin Cabot、Andy Bryon定係Andrew Cabot都拒絕回應傳媒查詢，所以目前無法證實消息人士講嘅嘢係真係假。

資料來源：People