早前Xbox Game Pass大幅加價引起玩家反抗，而Microsoft 近日嘅新動作，似乎就透露出佢哋未來嘅經營策略。根據《IGN》與 《ScreenRant》報導，微軟正內部測試一個「廣告支援版」的 Xbox Cloud Gaming 服務，玩家需要先睇一段大約兩分鐘嘅廣告，然後先可以免費玩遊戲。而且並非無限任玩，傳聞會設定每段遊戲時間大約一小時、每月總共五小時嘅使用上限。

圖片：Microsoft

Xbox Cloud Gaming 係微軟的雲端串流遊戲服務，玩家唔需要考慮手上嘅硬體性能，亦唔需要安裝或下載遊戲，只需用手機、PC、Xbox 主機，甚至瀏覽器、Smart TV連上平台就可以直接打機。呢個服務原本屬於Xbox Game Pass訂閱嘅其中一部份，但依家測試緊嘅廣告版就係免費對外公開，意味住任何人只要有裝置、有網絡，就可以免費遊包括自己購買、Xbox Free Play Days 期間提供，以及一些復刻類 經典遊戲。

圖片：Pixabay

根據目前曝光資料，測試版主要以「前置式廣告」為主，用戶在每次開遊戲前都會睇兩分鐘左右嘅廣告，換取一個小時的遊戲體驗；同時據報有可能會加入每月限額，一個最多玩5個鐘。這種模式對輕度玩家來說可能已經夠用，但對重度玩家而言，每月五小時上限同廣告插入可能會令體驗大打折扣。從 Microsoft 的角度睇，呢次實驗其實係希望將 Xbox 的雲端遊戲生態「推廣到更大市場」，吸引無主機、未訂閱 Game Pass 嘅用戶入場。最終能唔能成功，就要睇廣告與遊戲體驗能否平衡得好唔好。

資料來源：IGN、ScreenRant