對於仍在觀望是否入手Nintendo Switch 2嘅玩家嚟講，而家可能就係最好嘅時機。市場調查機構Niko Partners近日發布「2026年產業預測報告」，指出受關稅及記憶體成本急升影響，任天堂好可能會喺今年內為Switch 2進行全球加價，甚至停售現時定價449美元嘅標準版主機，改為只銷售遊戲同捆包。

Niko Partners分析指，雖然Switch 2目前定價相較去年已加價嘅PS5（美國加50美元、香港並未跟隨）同Xbox Series X更具競爭力，但喺記憶體成本持續上升嘅情況下，任天堂今年恐怕都難以獨善其身，預料會跟隨Sony同Microsoft步伐，進一步上調主機售價。雖然報告未有明確預測Switch 2實際會加幾多，但就提到任天堂可能會停售449美元嘅標準版主機，改為只銷售499美元或更高價錢嘅遊戲同捆包。換言之，玩家想買機，隨時要「局住」多畀50美元或以上，同時綁定一隻遊戲一齊買。

對於加價傳聞，任天堂社長古川俊太郎去年11月曾向股東表示，隨住Switch 2全面投入量產，部分生產成本有機會下降，從而抵消材料價格上升嘅壓力，因此暫時未有加價計劃，除非關稅政策出現調整，或者發生其他重大外部變數。

不過，佢上周接受《京都新聞》訪問，被問到Switch 2會否加價時就未有正面回應，只表示「無法對假設性問題發表評論」，但同時亦坦言現時記憶體市場非常波動，公司會密切留意相關情況，口風相比之前明顯轉趨保守。加價似乎已經由「會唔會發生」，變成「幾時發生」嘅問題。