每逢頒獎季來臨，荷里活各大片商都會密鑼緊鼓展開一連串宣傳同公關活動，藉此吸引評委同觀眾目光，提升作品知名度與獲獎機會。身為奧斯卡常客嘅Matt Damon，自然亦參與過唔少呢類「拉票」活動，不過佢最近接受訪問時就直言，自己其實一向都好抗拒，甚至覺得成件事相當本末倒置兼古怪。

Matt Damon近日為宣傳新作《The Rip》接受Netflix Podcast節目《Skip Intro》訪問，被問到喺荷里活入面有咩事情最令佢感到「JOMO（Joy of Missing Out，樂於錯過）」時，佢毫不猶豫地回答：「頒獎季。100%」並進一步解釋：「我最唔鍾意就係『拉票』（campaigning）呢個概念。對我嚟講，成件事好古怪，完全係本末倒置。」話雖如此，但Matt Damon亦嘗試從另一角度理解呢類活動嘅存在價值：「或者咁樣對電影係有好處嘅，能夠增加曝光率，引發大眾多啲思考及討論電影。我希望真係會咁啦...」

即使佢本人唔太享受，但相信Matt Damon好快又要投身頒獎季宣傳，皆因由佢主演嘅史詩級鉅作《The Odyssey（奧德賽）》將於今年7月正式上映。提到呢部作品時，Matt Damon形容拍攝經歷對佢影響極深，至今仍未完全消化到：「去年拍《The Odyssey》嗰陣，我真係有種感覺，好似一生人得一次機會，可以拍一部David Lean風格嘅超大型電影。嗰種感覺就好似，呢套可能會係我最後一部參與、而且仲係用菲林拍攝嘅超級大製作。」另外佢亦表示，能夠同一流導演同頂級班底合作，再加上一個出色嘅劇本，亦令佢不禁回想起當年初入行拍《School Ties（校園糾紛）》時嗰種「夢想成真」嘅感覺。