AI熱潮唔單止搶貴GPU、RAM同SSD，而家連大容量HDD都被人掃清光！美國硬碟大廠 Western Digital (WD) 行政總裁Irving Tan近日向外界確認，受AI數據中心龐大需求帶動，公司2026年HDD產能「幾乎全數售罄」，部分合約甚至已經簽到去2027同2028年。

WD行政總裁Irving Tan在最新財務報告會議透露，目前公司旗下嘅「前七大客戶」已透過正式採購訂單（Firm Purchase Order，即係冇得取消），幾乎包起2026年全年產能。除此之外，WD更同其中兩間大客簽訂了長期協議（LTA）至2027年，有一間甚至簽到2028年，提前鎖定未來幾年嘅供應量與價格。

點解會咁誇張？當然係AI。WD投資者關係副總裁指出，現時公司約89%收入來自雲端業務，相反一般消費者市場只佔5%。面對咁懸殊嘅差距，在商言商之下，WD自然更傾向將產能分給企業級客戶。皆因AI發展離不開大量數據儲存，雖然SSD速度較快，但要儲存以Exabyte（1EB約等於100萬TB）為單位嘅海量內容，例如網絡抓取數據、備份、推理日誌等等，HDD依然係目前最具成本效益嘅方案，導致各大科技巨頭瘋狂搶貨，令供應鏈承受巨大壓力。

隨住主要產能被企業大客長期鎖定，零售市場可分配空間自然收窄。對於想買大容量HDD嘅用家嚟講，可能真係要有心理準備，嚟緊價格同供貨情況未必會太樂觀。