荷里活性感女神Sydney Sweeney近年憑火辣身材極速上位，人氣爆燈之餘，卻同時招惹大量是非與批評。不過，外界對佢嘅負面聲音，未必真係關乎佢性格或者言行。一項心理學研究指出，女性對身材出眾嘅同性，會更容易產生敵意。換句話講，Sydney Sweeney頻頻成為箭靶，可能純粹因為佢嘅驕人上圍令其他女性感到受威脅。

據《Daily Mail》報導，德州農工國際大學（Texas A&M International University）心理學及傳播學系於2024年發表了一項研究。團隊邀請咗114名西班牙裔女性參與測試，並向佢哋展示一系列經過裁剪、只見到頸部至軀幹嘅女性胸部照片（以此排除樣貌因素影響），涵蓋A至D CUP及三種唔同下垂程度嘅胸部。受訪者需要評估自己對相中人作出「間接攻擊」嘅可能性，例如講是非、造謠或排擠對方。結果發現，受訪者對D Cup女性表現出嘅敵意，明顯高於A Cup及B Cup女性，而胸部是否下垂就無太大影響。

研究團隊解釋，由於男性普遍將胸部形態視為擇偶嘅重要特徵（尤其係尺寸），女性自然會對呢個身體部位特別關注，亦會留意其他女性嘅身材狀況。當見到身材「凸出」嘅同性時，容易觸發「同性競爭（Intrasexual Competition）」心理，將對方視為求偶市場上嘅勁敵，繼而採取言語攻擊或社交排擠等手段去貶低對手。而且，無論受訪者本身性格好勝定隨和，呢種敵意反應都相當一致，意味著呢種攻擊行為並非個人修養問題，而係更似一種寫在基因入面生物本能反應。

事實上，Sydney Sweeney過去一年確實係是非纏身。在去年7月為American Eagle拍攝牛仔褲廣告，因為口號「Sydney Sweeney Has Great Jeans」利用「Jeans（牛仔褲）」同「Genes（基因）」大玩食字Gag，而被批評係宣揚「白人至上」及「基因優越論」，被指過時兼政治不正確。隨後更傳出佢係註冊共和黨員，連美國總統Donald Trump都公開大讚「鍾意佢個廣告」，令佢無端端被捲入左右派爭拗之中，變成政治角力嘅焦點。

面對種種指控與標籤，Sydney Sweeney早前接受《Cosmopolitan》訪問時坦言相當無奈。佢話自己只想專心做好藝術創作，無意牽涉政治，但外界總係過度解讀。至於點解唔出面澄清，佢直言：「我唔係一個充滿仇恨嘅人。如果我話『嗰啲唔係事實』，啲人又會覺得我只係想為自己洗白，根本無得贏（There’s never any winning）。我唯有繼續做自己，因為我好清楚自己係個點嘅人，我冇可能令全世界都鍾意我，我知自己嘅原則喺邊。」