絕大部份人對於自己嘅性格都好有興趣，亦係點解坊間會有無數咁多性格測試。但如果講到自己嘅「『性』格」，大家又有幾了解？著名成人網站Pornhub近日就與美國性博物館 (Museum of Sex)、普林斯頓大學分子生理學教授Lee Silver及印第安納大學Kinset研究中心，共同推出「SexTypeMe」網上問卷，等大家更了解自己嘅「性」格，仲可以同Pornhub上嘅Model或朋友比對一下添！

「SexTypeMe」並非普通嘅性愛網上調查，而係希望「了解『性』格是否『性格』嘅映射，又或係不相關嘅心理表達領域」，所以測試入面嘅問題亦唔係「你鍾意咩姿勢」、「你幾耐做一次愛」呢啲簡單問題，而係透過比例尺選擇你對兩句陳述句嘅傾向。例如佢會問你覺得「與伴侶一起成人電影很興奮」定係「完全不能接受」，「如果我為對方口交，對方是否一定要幫返你口交」等，甚至會出現「辛苦工作過後我傾向與朋友聚會」定係「自己休息」、「真愛是否存在」等如性愛冇咩關係嘅深度問題。

完成測試後，你嘅「性」格分析結果就會寄去你電郵，入面會以多個層面分析你嘅「性」格傾向。例如你係尋求新對象新刺激嘅「Explorer」定著重親密連結嘅「Bonder」；性愛時會更加著重埋牙肉搏嘅一刻，定前戲與想像帶來嘅曼妙；會積極定尋找新嘅性愛體驗，定滿足於現狀；會理性地思考性與愛，定被情緒主導決定等，令大家更了解自己嘅『性』格、習慣及需要。亦可以與其他做過測試嘅普通人又或成人演員做比對，了解一下有咩人同你有相似『性』格，甚至能夠將整個分析分享畀親友，等大家更了解你。

「性」向來都被視為禁忌之一，絕大部份人都只能自己一個探索。或者呢個測試就會令大家更了解自己，亦可以開啟與伴侶 (或親友) 之間嘅討論。

資料來源：SexTypeMe