出咗名拍動作戲唔用替身堅持親身上陣嘅Tom Cruise，即使就嚟60歲人依然非常矯健敢搏敢試，敬業精神令人真心佩服。近日有外媒就影到佢為新作《Mission：Impossible 8》進行彩排，喺部反轉飛嘅雙翼機機翼上又坐又倒吊，雖然一定會做足安全措施，但睇到都覺得牙煙。

據FOX NEWS報導，剛拍完《Mission：Impossible 7》嘅Tom Cruise就即刻開拍第8集，日前有記者就影到佢喺倫敦為新作彩排高難度特技，坐上一部雙翼機飛到2000英尺（約600米空中，然後爬出機艙坐喺機翼上面，期間部飛機更多次倒轉飛行。事實上，幾個月前就有傳過Tom Cruise學緊揸一部二戰飛機，為新作帶嚟全新特技。

由於疫情關係，Tom Cruise主演嘅《Top Gun: Maverick》及《Mission: Impossible 7》分別延期到出年5月及9月上映，而《Mission：Impossible 8》就預計要等到2023年。