近年「平權」乃係最多人關注嘅社會議題之一，特別係對於「LGBT+」族群，無論係大眾對佢哋嘅觀感，又或實際上嘅社會話語權，都比過去有所提升 (夠唔夠就係另一回事啦)。但據美國一個研究，其實社會中仲有另一群人，因為佢哋嘅性喜好而被污名化，而且嚴重程度比起LBGT+族群更甚，佢哋就係BDSM愛好者。

來自美國Bridgewater 州立大學嘅Ashley A. Hansen-Brown以及Sabrina E. Jefferson近日公開咗一個研究。佢哋透過Amazon嘅人力資源服務Mechanical Turk招募咗257名既唔係BDSM愛好者，亦唔係同性戀者嘅普通大眾，並將佢哋隨機分成三組，分別回答一份關於佢哋對BDSM愛好者、同性戀者、又或普通戀愛關係嘅觀感問卷調查，同時所有受訪者都需要回答人口資料 (歲數、性別之類)，以及疫情對佢哋嘅生活有幾大影響。

結果發現，不論受訪者嘅年齡、性別、「疫情壓力」嘅高低，佢哋對於同性戀者「負面觀感、情緒及行為反應」——亦即「污名化」，都比對普通戀愛關係要高；但更令人意外嘅係，佢哋對於BDSM嘅污名化，亦比起對同性戀者要高，換言之社會大眾對於BDSM愛好者嘅觀感，係比一直話自己被歧視嘅同性戀者更差。

研究總結指出，呢個結果一方面係反映近年推動同性戀者平權嘅行動係有進展，另一邊廂亦顯示BDSM族群嘅權益其實幾廿年黎都冇變過。認為需要有更多研究去提出為BDSM族群正名嘅方法，以免衡量社會污名化對佢哋嘅健康影響。

資料來源：Perceptions of and stigma toward BDSM practitioners