講起《Lord of The Rings (LoTR)》，相信大家都會第一時間諗起由Peter Jackson執導嘅「正傳」三部曲，以及《The Hobbit》三部曲。不過其實整個系列最「新」嗰部電影，都已經係2014年嘅《The Hobbit: The Battle of the Five Armies》，換言之已經有8年冇拍過新作，結果因為隔得太耐，所以《LoTR》嘅電影版權已經於早前到期，並由一間瑞典公司成功收購，換言之未來或會出現新版嘅《LoTR》電影。

來自瑞典嘅遊戲公司Embracer Group AB於昨日發出公告，指佢哋已經於版權原擁有者Saul Zaentz手上，買咗代表《LoTR》「整個版權」嘅Middel Earth Enterprises，意味住佢哋未來能夠利用J.R.R. Tolkien創作嘅所有小說，推出電影、遊戲、舞台劇、主題公園、週邊等。

而於公告中，Embracer Group亦透露佢哋其中一個發展方向，會係「推出以系列著名角色，如甘道夫、亞拉岡、咕嚕、凱蘭崔爾、伊歐玟，以及其他小說中嘅角色為主題的電影」。而考慮到原版電影嘅演員年齡，相信新版電影會搵黎另一批演員黎出演呢班大家耳熟能詳嘅角色。

另外由於《LoTR》版權改變，Fans們亦擔心早前宣佈會製作嘅影視作品，例如動畫電影《The War of the Rohirrim》等，會因此而受到影響，目前亦冇消息指出呢啲作品係會繼續製作定取消。但值得一提嘅係，將於9月2日播出嘅Amazon Prime劇集《The Rings of Power》，就因為係電視劇集嘅關係而不在版權之中，所以唔會受到影響。

資料來源：Embracer