近年歐美多國都非常著重青少年觀看成人內容嘅問題，例如美國猶他州早前就實施新嘅年齡驗證法，導致Pornhub封鎖所有猶他州嘅IP、法國亦推出類似法案希望「保護年青人」。不過美國賓夕法尼亞州嘅Temple大學就決定反其道而行，開設「AV研究課程」，希望為學生提供另類嘅性教育資訊。

呢個「社會角度與電子成人內容：另類的性教育》課程由該校嘅「性別、性及女性研究」助理主管Jennifer Pollitt擔任教授，自宣佈會開課以黎已經吸引到大量學生報讀，課堂名額亦已經由25人增至40人，仲有好長條隊等緊入讀。Pollitt教授指出，課程嘅目的係希望以AV作為起點，以討論種族、身體能力以及父權等話題。同時佢亦指出，由於美國並無強制性嘅性教育課堂，所以AV其實係唔少青少年唯一接觸到嘅性知識素材，而佢就希望透過研究AV內容，令青少年知道AV並非只有二元性嘅好與壞，並鼓勵佢哋於課堂上討論「同朋友都未必敢傾嘅私密話題」，「協助佢哋建立更親密嘅愛情或者性關係」。

不過，如果你以為課堂係會不停睇AV嘅話呢，就可能會有啲失望。因為據報課程簡介講到明，教學素材中係唔會有任何AV，但就會有相關嘅TED Talk，以及Netflix早前上架嘅Pornhub紀錄片《Money Shot》等。所以的確係一個正正經經嘅文化研究型課堂黎。

資料來源：Business Insider