早前我哋有同大家報導過任天堂法務部勁到連自己隻遊戲《薩爾達傳說 王國之淚》個官方Twitter都「錯手殺埋」一事，相信大家都知佢哋有幾落力。而其實世界上仲有另一個法務技能點滿嘅企業，就係遠在地球另一邊嘅Disney。而近日就有日本玩家於《王國之淚》中砌出一隻米奇老鼠，仲要砌起之後幾秒鐘內就遭到「天譴」摧毀，被網友戲稱為「東、西方法務對決」。

ネズミの神獣が！！
神の怒りに触れた。#ゼルダの伝説   #ティアキン pic.twitter.com/k8WVVPCW6A

— にかいどう@レゴ機械生物図鑑 (@uran120) May 15, 2023

卻說《王國之淚》嘅一大特色，就係玩家可以收集不同部件，再自行組合成不同嘅機關、機械。而自遊戲推出後，幾乎所有《王國之淚》嘅報導都係關於玩家「發明」咗啲咩出黎，由坦克、飛機，以至高達、JJ噴火巨人等通通都有。幾乎冇人去搵返公主。

而日本Twitter用家「にかいどう@レゴ機械生物図鑑 (uran120)」近日亦上傳咗自己嘅發明，不過佢嘅發明就「樸素」得多，只係一隻米奇老鼠。但好笑嘅係佢隻米奇老鼠砌完幾秒鐘後，就因為遊戲內嘅天氣效果而被雷劈爆。「にかいどう@レゴ機械生物図鑑」留言笑說：「老鼠神獸！觸發咗神之怒火！」

由於任天堂同Disney兩間公司都因強而有力嘅法務部門而聞名，所以唔少網民睇完條片之後都笑稱道雷係任天堂或Disney發落黎懲罰侵權玩家，「Disney啲律師真係好快手」、「任天堂對Disney，Fight！」之類，令影片成為日本玩家近日嘅趣聞之一。