卻說近日台灣網絡掀起一股「反RISU」潮，網民呼籲大家抵制所謂嘅「RISU自拍外流群組」，甚至有人於現實世界公審有追蹤相關群組嘅男同學。事件引起高雄市議員白喬茵注意及解說後，更進一步得到主流媒體報導。究竟咩係RISU群組？香港嘅男士們又需唔需要小心？

其實所謂嘅「RISU群組」，其實就係利用經「短網址 (Shortlink)」服務「RISU」縮短過嘅連結，分享標榜為「自拍流出」成人內容嘅群組。由於原連結經過縮短後，各大社交平台 (如Facebook) 嘅系統無法偵測到原連結中嘅實際內容，所以群組使用者就利用呢個方法避開平台嘅自動偵測，分享不符合平台規範嘅成人內容。

據報呢啲群組遍佈Facebook、Line、Dcard以至Telegram等大家熟知嘅社交平台，甚至於Facebook隨便搜尋都搵到一大堆，而且每個群組都顯示有數以萬計成員。情況相當嚴重。

由於此類群組都以「自拍流出內容」為賣點，除咗有違道德外，有侵犯別人私隱嘅嫌疑外，分享當中嘅內容更有可能觸犯法例。所以近來台灣網絡就掀起一股「抵制RISU」嘅行動，呼籲大家與有加入「RISU群組」嘅人絕交。台灣更有人報導指，有女大學發現男同學有加入相關群組後，認為對方係「噁男」而進行「公審」。

不過據該男同學表示，自已從來都冇加入過任何相關社團，試圖向該名女同學解釋後更被嘲諷「自己入咗會唔知？」後來有人發現，原來Facebook嘅群組能夠主動拉人加入，甚至只要你有睇過任何帖文，都會自動成為成員之一。亦有人發現部份「RISU群組」係「借殼上市」，原本為分享Meme圖嘅搞笑群組，突然就改名變成「RISU群組」。如果大家都唔想無啦啦被當成「噁男」，或者都要檢查一下自己加入咗啲咩群組啦。

資料來源：中時新聞網