卻說由庵野秀明做導演嘅電影《真．幪面超人》將於今個月上映，相信一眾香港「拉打」Fans都相當期待。《真．幪面超人》其實係為咗紀念系列第一套作品《幪面超人》播放50週年 (1971-2021)嘅企劃之一，不過因為各種原因延遲到今年先上映。而延遲嘅結果，就係唔單止「錯過」咗《幪面超人》嘅50週年，就連《幪面超人》嘅續作《幪面超人 V3》(1973年播出) 都已經到達50週年。最近PREMICO更為《V3》推出限量嘅紀念手錶添！

呢隻「幪面超人 V3 50週年高級手錶」嘅主要賣點，當然就係佢融入V3元素嘅外觀設計。首先錶面設計就係源自V3條變身腰帶，除咗有橢圓形嘅線條以及「V3」標誌之外，更完美地利用兩個小錶盤取代腰帶上嗰兩個「風扇」。同時錶面外圍加上綠色線，以呼應V3嘅主色。錶殼則採用黑鋼，令腕錶嘅外型更為實在、沉穩。而底蓋就刻有V3駕駛電單車嘅英姿，以及獨立編號。

而腕錶嘅包裝盒亦有心思，除咗用上「V3綠」之外，打開後更可以見到全彩嘅V3大頭相，陣「昭和味」即刻湧哂出黎。

而為紀念V3於1973年播放，所以呢隻紀念腕錶都只會限量生產1973隻。售價方面就盛惠49,280Yen (連稅)，即係約HK$2,750左右。你問值唔值？咁就睇你對「拉打」幾有愛啦！

資料來源：PREMICO