相信大家都應該聽聞過有人為OnlyFans網紅（有人叫「網黃」啦）一擲千金，好似去年年尾我哋報導過嘅美國網紅Sophie Rain咁，年收入就達到3.3億港紙。但大家有冇諗過呢班大金主為一個網紅花咁多錢嘅原因係咩？單單係因為鹹濕、變態？近日一個新調查就發現呢班大金主其實無咁膚淺。一擲千金嘅背後，其實係為咗追求現實得唔到嘅情感連結。

Sophie Rain

圖片：sophieraiin on IG

推出OnlyFans管理工具（例如自動回覆、分析等）嘅Supercreator早前公佈一個調查，指出一眾大金主與OnlyFans網紅之間嘅私人對話中，有78%都係寵物、工作、兒時回憶以至電視電影、個人興趣等與性無關嘅瑣碎話題，而大金主之所以要同OnlyFans網紅講呢啲話題，係因為佢哋覺得無法同現實生活中嘅另一半分享。換言之大金主們之所以課金，其實大部份時間都只係想搵個靚女傾下計。

例如上面提到嘅Sophie Rain就指出，佢同最大金主——一個叫Charlie、過去兩年課咗600萬美金畀佢嘅美國已婚男人——幾乎每日都會透過OnlyFans傾計，但對方極少會索取裸照，反而係同佢交代自己今日過成點、關心下Sophie嘅生活，「我更似係佢嘅情感支援系統」。同時佢亦提到外界經常認為大金主一定會有特別奇怪嘅癖好及要求，但呢個Charlie最常要求嘅，係Sophie著哂衫做日常事嘅照片。

Babi Palomas

圖片：babipalomas on IG

而Supercreator嘅報告亦指出，訂閱者與OnlyFans網紅講得最多嘅七個話題分別係「自己嘅家鄉及成長」、「工作（炫耀或者發洩）」、「遊戲、烹飪、運動等興趣」、「寵物」、「網紅們之前嘅帖文或假期」、「電視、電影及書籍」以及「健康及健身」，換言之呢班大金主其實同一般「R水吹」嘅阿叔無咩分別。

Supercreator CEO Yuval亦指出，單純嘅裸照於網絡世界非常容易獲得，自然亦唔會吸引到金主們使大錢；「但來自你夢想中嘅創作者嘅有意義、持續性嘅關注？呢樣先能夠推動忠誠度及（網紅）嘅收入」。另一邊廂，「大金主為追求陪伴而課金」呢個現象亦顯示唔少男人雖然結咗婚，但就無法滿足其情感需要。例如來自巴西嘅OnlyFans網紅Babi Palomas就曾經表示，有大金主課金只係為咗要佢做啲一般妻子唔願意做嘅事，例如陪佢睇場波而唔投訴。

資料來源：New York Times