大部份人應該都認為社會係向住越黎越開明嘅方向發展，即係啲咩「大男人」呀、「男人講嘢女人收聲」呢類思想應該係我哋阿爺嗰代嘅產物。不過近來英國主導嘅一個超大型研究，就發現1997年以後出世嘅「Gen Z」，比起上三代人都要更加保守，例如有31% Gen Z男性認為「妻子應該永遠服從丈夫」，比起嬰兒潮世代（1946-1964）高近3倍。但大家又唔好急於批評Gen Z喎，事關據分析，佢哋其實社會壓力嘅受害者黎。

話說市場調研公司Ipsos嘅英國分部，早前與倫敦國王學院（King's College London）全球女性領導力研究所合作進行一個橫跨英、美、澳、巴西、印度等29個國家、共23,000人參與嘅超大型研究，希望了解不同地區、不同世代（嬰兒潮、Gen X、千禧世代、Gen Z）嘅男女嘅性別觀。

結果發現男性性別觀嘅保守程度，其實係隨世代上升。例如上面提到嘅「妻子應該永遠服從丈夫」，嬰兒潮世代只有13%人認同，Gen X就升到21%、千禧世代係29%，最高嘅就係Gen Z嘅33%；同時有33% Gen Z男性認為「丈夫應於重要事件上有最終決定權」，同樣高於之前三個世代。此外有24%Gen Z男性認為女性「不應顯得太獨立或自給自足」（嬰兒潮男性只有12%）、21% Gen Z男性認為「真正的女人不應主動提出性行為」，遠高於嬰兒潮男性的7%。種種跡象都顯示Gen Z男性嘅保守程度係眾世代之最。

研究同時發現，Gen Z男性除咗管女人之外，對自己嘅「雄性形象」亦非常在意。例如30% Gen Z男性認為男人不應對朋友說「我愛你」（嬰兒潮男性只有20%）、43% Gen Z男性認為「即使天生體型不大，年輕男性亦應努力表現得強壯」、21% Gen Z男性認為「參與照顧小孩的男性比較沒男子氣概」（嬰兒潮男性只有8%）。

而呢種期望，好可能係來自社會壓力。例如當被問到「男性應該作為家庭的主要收入者時」，只有約15%英國男女同意，但同時有38%認為「社會大部份人都認為男性應該作為家庭主要收入者」。換言之Gen Z之所以顯得「比阿爺嗰輩」更加保守，係因為佢哋更受到社會期望嘅壓力，希望成為社會要求嘅「雄性」，繼而要度女性同樣退守至更保守嘅位置。

資料來源：New York Post、King's College London