相信唔少男士都認為，如果自己唔夠靚仔又唔夠有錢，咁最起碼應該要有副見得下人嘅Body先可以識到女朋友。但問題係點樣嘅body先算係「見得下人」甚至有吸引力呢？近日一個橫跨英國、中國以及立陶宛嘅研究‵，就整理出一系最具吸引人嘅男士體型指標！

圖片：ImageFX

研究由一群分別來自中國、英國及美國嘅研究者共同發佈，其目的在於發掘男性體型與吸引力之間嘅關係。研究團隊先搵黎15張體態各異嘅X光圖片，計算相中人嘅肩腰比例、BMI以及體脂等身體數據，再於中國北京、立陶宛帕聶韋日斯以及英國鴨巴甸招募283名有男有女，性向不詳嘅大學為呢15張男性體態照評分，之後再睇睇各項身體數據與吸引力評分之間有咩關聯。

結果首先發現，BMI介乎23至27，亦即健康至輕度肥胖嘅體型吸引力評最高，似乎顯示大家都偏好中等身材，而非極度精瘦或大隻嘅體型。同時研究亦發現肩腰比例（例如倒三角身材）對於吸引力嘅影響有限，只要體脂納入考慮之後，來自中國及立陶宛嘅受訪者對於男士體型嘅評分直頭唔受肩腰比例影響，而英國受訪者雖然亦受肩腰比例影響，但重要性遠不及體脂。

圖片：ImageFX

驟眼睇，上述嘅研究結果似乎證明不論男女其實都偏向中等身材嘅男士，換言之其實唔需要太瘦太大隻，甚至有少少肥先係最有吸引力。不過同一研究亦發現，體脂其實先係最重要嘅吸引力影響指標。即使三個地區嘅受訪者於文化、經濟、社會背景均有不同，但全部人都認為13至14%體脂嘅男士最為吸引。

而一般而言，男士嘅正常體脂應該落於15至25%之間，高於此數字即為肥胖，而低於此數字就算係健美體態。再考慮上面提到嘅BMI 23至27，換言之最吸引嘅體態係一個175cm高，體重介於70至83kg（或180cm高、75至87kg），而且主要係肌肉嘅人。而ChatGPT就話呢個數據大約會係一個短跑選手，又或籃球員咁嘅體態——換言之呢，想要吸引到人嘅體型，結果都係要努力鍛練嘅。

資料來源：The relationship between body fatness and physical attractiveness in males