日本動漫文化於全球都有重大影響力，而隨住更多動畫登上各大串流平台，其受歡迎程度似水漲船高。近日Netflix就公佈最新數據，指出日本動畫嘅觀眾於過去數年間以倍數增長，到目前為止其全球訂閱者中有一半都會觀看日本動畫，證明日本動畫已經成為全球主流之一。

圖片：Netflix

Netflix日前於洛杉磯舉行嘅Anime Expo中舉行活動，除公佈其未來日本動畫作品之餘，亦公開咗相關嘅觀看數據。據Netflix指出，目前其全球超過3億個訂閱者之中，有超過一半，即1.5億個用戶、約3億個觀眾曾經於Netflix上觀看日本動畫。而日本動畫嘅年播訪次數於過去5年間增長三倍，到2024年時已經達到10億次。

而上述觀看數據並非來自一兩部人氣動畫。Netflix指出2024年間，有33部動畫曾經登上其最多人觀看非英語作品嘅Top 10名單之中，比起2021年增長一倍。證明日本動畫整體嘅吸引力比去過去數年大幅增長。

Netflix亦留意到日本動畫觀眾之中，有近九成人都係觀看不同語言嘅配音版本，是以未來將會繼續為日本動畫推出配音版本。目前Netflix已經有提供33種不同語言嘅配音選擇。未來Netflix當然亦會繼續推出新日本動畫內容，當中包括第一季曾經佔據Netflix Top 10名單十週之久、下星期就上線嘅新一季《SAKAMOTO DAYS 坂本日常》。另外活動中亦公佈咗2022年大熱動畫《Cyberpunk Edgerunner》嘅續集《Cyberpunk Edgerunner 2》前導預告。

資料來源：The Hollywood Reporter