試想像下，如果你係一個年輕女性，遇上一個男性嘅「鹹濕目光」，你會有咩反應？你可能會覺得不安，甚至會開始遮住自己嘅身體以尋求安全感。不過一個中國最新研究就發現，中國女性於感到不安之餘，卻可能仍然會繼續物化自己（例如著得性感啲）——只要對方係個有錢人或者靚仔就得啦。

圖片：ImageFX

話說來自重慶西南大學嘅「Dingcheng Gu」及「Lijun Zheng」早前女性物化自己嘅行為做咗個研究。佢哋於某間位於中國市區嘅大學招募咗班女大學生黎做咗兩個實驗。第一個實驗中，女大學生們要假設自己將要與一名男子初次約會，但唔同女學生面對嘅約會對象於社會經濟地位高低（例如教育程度及財富），以及會唔會發出「性向物化目光」（即係「鹹濕目光」）中有所差異。然後女大學生就要於一條性感、一條保守嘅裙中，揀一條著去同呢個男性約會。同時亦要完成一份關於安全焦慮程度嘅問卷。第二個實驗基本上一模一樣，差別只在於今次變嘅唔係男性嘅社會經濟地位，而係佢哋嘅外表吸引程度。

實驗嘅目的，在於探討女性面對來自不同男性嘅「性向物化目光」後，反應會唔會有所不同。如果女性揀性感嘅裙，代表佢哋會隨男性目光而自我物化；揀保守嘅裙就反之。

圖片：ImageFX

結果就發現，無論面對邊種男性嘅「鹹濕目光」，女性嘅安全焦慮程度都會上升。但面對高社會經濟地位、或靚仔時，女性仍然傾向會選擇著性感嘅裙出席約會。換言之研究中嘅中國女性，喺面對所謂「筍盤」時，就算感到不安都會迎合對方嘅意願性化自己。

研究者表示，呢個結果顯示中國女性於面對性向物化環境時，除咗衡量自己嘅人生安全之外，亦會考慮潛在利益。換句話講，就即係中國女性為咗要吸引到一個「筍盤」，就算感到不安都會展示性感魅力試圖吸引對方。

資料來源：Effects of sexually objectifying gaze on women's self-sexualization in a mating context: The tradeoff between safety pursuit and resource pursuit