如果依家你有套戲想睇，你嘅第一反應可能唔係睇下戲院仲有無上、DVD出咗未，而係上網串流平台有無提供。反正依家有咁多個平台，總有一個會解決你問題吧？對於唔少人黎講，呢個改變可能屬於「方便」嘅範疇，不過HBO Max母公司Warner Bros. Discovery（WBD）CEO David Zaslav就有另一個睇法：佢認為依家市面上有太多串流平台，搞到觀眾體驗「非常惡劣」。

圖片：justwatch.com

話說日前David Zaslav出席由Goldman Sachs舉行嘅「Communacopia + Technology Conference」，席間被問到佢對於目前串流市場嘅睇法，而David Zaslav就稍為有啲語出驚人地表示：「市場入面有太多參與者啦。觀眾依家打開電視，個消費者體驗真係非常惡劣。無論喺邊個市場，都有太多選擇，搞到大家都要上網搵『呢套戲喺邊個平台？』、『我點樣睇到呢個平台？』」

誠然David Zaslav係有幾分道理。相信大家都試過上網睇到人介紹某套劇集、電影，結果仲要自己Google先知道套嘢喺邊到有得睇，最煩嘅係有時套嘢仲要係一個你無訂閱嘅串流平台限定，甚至有可能個平台根本就無進入你所在嘅地區或國家。加上每個平台於每個地區提供嘅內容都有些少唔同，令觀眾更加混亂。

既然David Zaslav提出呢個問題，係咪代表HBO Max未來會嘗試做業界龍頭，吸引其他平台嘅內容，或者主動將自己嘅內容提供到更多其他平台呢？睇黎就唔似係啦。事關喺同一場會議中，David Zaslav先指出HBO Max無論於劇集、電影或者串流服務本身都非常高質，所以長久以黎都係價格過低，未來將會考慮加價。同一時間佢亦指出過去HBO Max係靠內容質素黎吸引觀眾，所以未有如其他平台（例如Netflix及Disney Plus）一樣禁止帳戶分享，但又指出黎緊佢哋都會仿傚。

無論係加價定係禁止帳戶分享，其實都係限制服務嘅普及度；既然認為內容質素係HBO Max安身立命之本，自然亦唔會同其他平台分享。咁睇黎佢上面嗰番說話都唔係為咗一般觀眾抱不平，而係單純嘅抱怨啦。

資料來源：Screenrant