漫畫《拳願阿修羅》第一話，山本一夫被十鬼蛇王馬嘅殺意嚇親之後，即刻走咗搵風俗店發洩。漫畫原文指出，呢種行為其實係被死亡恐懼激發嘅本能反應，因為覺得自己真係要死，所以本能想將自己嘅種族延續下去。放於社會科學，其實就係所謂「恐懼管理理論」嘅其中一種演繹。而近日意大利學者Issam Nessaibia主導嘅一個研究，就從俄烏戰爭中發現支持此理論嘅客觀證據：戰爭越激烈，烏克蘭人民就睇越多AV。

圖片：https://www.ccnull.de/foto/pornhub-logo-on-a-computer-screen-with-a-magnifying-glass/1008542

研究主要整合三種資料來源：Google搜尋趨勢以顯示烏克蘭人於不同時期對咩話題感興趣、Pornhub觀看數據以顯示其觀看AV嘅行為變化，以及聯合國人權事務高級專員辦事處發出嘅俄烏戰爭傷亡報告，以顯示戰爭嘅激烈程度。結果就發現，自2022年3月，即俄羅斯於2月底入侵之後，烏克蘭地區搜尋「Pornhub」嘅人數就大幅增加，同時增加嘅仲有戰爭地圖以及社交距離等戰爭相關話題，換言之當時烏克蘭人係一邊關心戰況，一邊搵AV黎睇。

此外，研究亦發現「每週平民死亡人數」與「AV內容搜尋次數」成正比，亦即戰爭越激烈、烏克蘭人就睇得越多AV。但呢個情況並非一直持續，「每週平民死亡人數」突破某個數字後，「AV內容搜尋次數」就會維持不變。

圖片：Melissa Maples

要留意嘅係，研究團隊發現「戰爭」與「睇AV」兩者並非直接關連，中間其實仲有「社交距離意識」作為載體。換言之烏克蘭人其實係因為戰爭帶來嘅恐懼以及社交距離限制而感到寂寞，於是轉向容易獲取嘅AV以尋求心靈慰藉。呢個亦係「真實」（Reality）成為Pornhub上最多烏克蘭人觀看類別嘅原因。

同一時間，「俄羅斯人」亦係烏克蘭人最常搜尋嘅Pornhub類別。研究團隊估計係一種心理防衛，將令人恐懼嘅對象轉化成性幻想題材以減低焦慮感。

資料來源：Implications of the Russian Invasion on Ukrainians' Pornography Consumption: Insights from Big-Data Processing