HMX Black Badger

Basel錶展入面 MB&F 除咗呢隻太空船之外，仲有隻錶叫HMX Black Badger，但我始終覺得個座鐘係型啲嘅。Starfleet Machine Black Badger太空船座鐘，有小時、分鐘、雙逆跳秒針加動力儲存指示，雖然上唔到太空，但無損佢高科技嘅形象。

中間黑色圓拱形嘅物體就係錶盤，見到小時、分鐘顯示，指針會順住弧形圓拱轉動。時分盤上面有另一隻小型圓拱轉盤，呢個 cyber 到爆嘅太空船能量儲存就係個座鐘嘅動力儲量，五格滿鍊 (40日動力儲量)，一格就表示得返 8 日。

雙逆跳小秒盤玩雷射砲塔造型。呢兩座砲塔一開始係互相平行，跟住會彼此交錯，最後會跳返去初始位置，每20秒完成一次完整動作。砲塔下方裝置戰艦嘅心臟 — 擒縱機關。

除咗48粒寶石軸承之外，銅質機芯內每一件零件都經過鍍鈀處理，而且都係由L'Epée的瑞士工坊精心打磨而成。鏤空基板同C型不鏽鋼同軸外結構，令輪系、發條盒均得以完整呈現。Starfleet Machine可以藉由垂直起落架以正、反面擺放，方便你將佢反轉上鍊同校時。

機芯周圍嘅外環C型圈下方、戰艦後方起落架內側、圓拱形轉盤形指針都有獨創夜光物料。3款夜光顏色 : 綠、藍、紫，每款限量 18 架。