Sorry，我講15克係唔夠準確，官方資料係講呢隻 Montblanc TimeWalker Pythagore Ultra-Light Concept連埋錶帶嘅重量係 14.88克，即係15克都無呀！睇圖見到一隻咁完整嘅機械腕錶，能夠玩到呢個重量，到底有咩乾坤？

之前全球最輕機械錶應該係Richard Mille幾年前幫拿度整嗰隻陀飛輪RM27-01，佢表殼連錶帶總重量為19克左右，今次Montblanc呢隻新錶比佢再輕4克，猶如戴一個5蚊銀喺手，個感覺簡直可以用「輕於鴻毛」去形容呀。

將一隻錶嘅重量減到呢個水平，一定要靠近期好熱門嘅高科技物料—碳纖，講過無數次，碳纖係一隻高強度但又非常輕盈嘅物料。Montblanc採用咗一隻叫 ITR Kevlar / Carbon嘅新複合碳纖物料，錶殼由納米碳纖維管道融合Kevlar組成，比不鏽鋼輕8倍，比鈦金屬再輕4倍。

Caliber MB 62.48機芯主要嘅物料都係鈦金屬，作最大程度鏤空設計，將不必要嘅部份盡量刪減，40mm錶盤簡單嘅小三針，一個紅色外圈，8點鐘位置見到個5星圖案，象徵一位羽毛球手職業生涯之中贏得嘅5項重要錦標，講到呢度，大家都應該估到Montblanc隻錶係向當世羽界最強男人—林丹致敬。