同一啲少睇波嘅巴打，或者女士們講返聲先，阿根廷係位於南美洲，而唔係非洲，所以今次同大家介紹嘅Malbec係南美代表 (我真係聽過有人話美斯踢非洲國家盃架)。Malbec，中文梅貝克、馬爾貝克，中文隨你點譯，原生於法國，移民咗去阿根廷，之後被發揚光大，黑色水果香氣，點綴絲絲煙燻氣息，充滿南美熱帶風情。

Malbec 葡萄

以前喺法國，Malbec 又被稱為 Cot 或者 Auxxerois，貴為波爾多混釀5大葡萄之一，但而家喺法國種植嘅Malbec已經比較少，絕大多數去咗阿根廷嘅門多薩 (Mendoza)，而南澳、智利、美國加州亦都會見到呢種葡萄，可見Malbec較受新世界飲家熱愛，亦較適合於新世界地區種植。

Vineyard in Mendoza

法國嘅時候就做配襯，去到阿根廷就變成超級巨星，Malbec而家已經成為阿根廷葡萄酒嘅代名詞。阿根廷嘅葡萄產區屬於大陸型氣候，四季分明，夏季雨量大約200毫米。Malbec主要產區喺Mendoza附近，其次為Lujan、Maipu，仲有南面嘅Uco Valley。

視乎種植情況，Malbec可以散發出黑櫻桃、李子、覆盆子、黑莓、藍莓等果香，另外於唔同年份 (Vintage)，你仲會發現到胡椒、皮革、煙燻、咖啡、可可，雲尼拿、茴香同椰子味，風味濃厚，個性強烈，酸度、單寧多為優雅，複雜嘅味道入口帶有衝擊性，又漸漸散發出誘人嘅餘韻。

玩阿根廷Malbec入門可以玩Trapiche、Trivento、Dona Paula、Fundacion de Mendoza 等名莊，全部作品都有著相當不錯嘅性價比，配搭有濃郁醬汁嘅紅肉、甚至係烤肉大餐都一樣咁正。