唔玩金、銀，Blancpain今年發表嘅巨浪腕表，係用咗墨西哥銀曜石錶盤，配合灰溶液鈍化處理、日本Rokusho工藝，雕刻出氣勢磅礡嘅巨浪圖案。靈感取自日本畫家，葛飾北齋嘅《神奈川巨浪 Grand Wave de Kanagawa》，層次分明，其動態配合圓形錶盤，線條、雕通部份都顯得恰到好處。

呢隻 The Great Wave 鉑金腕表，立體感十足、禪意味濃，望著相當有古典韻味。製作方式係首先將鑲刻部件固定於赤銅物料之上，再浸入日本Rokusho銅綠鹽之中，造出灰綠色嘅效果，浪花部份需要做拋光處理，增強動浪捲九丈嘅氣勢，最後固定於墨西哥銀曜石盤之上，就成為一幅「靜中帶動」嘅藝術品。

由於錶盤嘅巨浪實在太靚，除咗指針當然唔需要多餘裝飾，反觀錶底，就見到佢地複雜嘅機械工藝。從品牌自家 Cal 13RO，改做出The Grave Wave搭載嘅Cal.13R3A機芯，串連起3個發條盒，實現8日嘅長氣動力儲存。動力儲存顯示可於錶橋位置睇到。

簡單嘅瑞士製小牛皮錶帶，做出優雅嘅襯托效果，全世界只此一隻，One & Only One，賣HK$1,369,000，遲吓帶大家去直擊呢隻工藝靚錶，唔走數。