今年Louis Vuitton喺Basel錶展向大家展示咗一款飛行陀飛輪，由日內瓦La Fabrique du Temps廠房精製，V形陀飛輪框架，V形基板，鏤空感甚強，隻Flying Tourbillon Poincon de Geneve Watch 亦為LV奪得品牌嘅第一個 Geneve Seal。而嚟緊6月會開賣嘅GMT Watch亦由La Fabrique du Temps研發，其頂級工藝水平加上頗具時代感嘅設計，相信非LV迷亦會心動。

在我而言，LV 唔少腕錶、產品都幾花俏，又可能因此而甚得強國人愛戴，低調如我嘅男士們，有時真係買唔落手。好彩，呢隻LV GMT並無誇張嘅表飾，Big V標誌一眼睇落去亦唔算突兀，品牌刻意走實用性路線，吸引返啲真正嘅「用家」，絕對係明智之舉。

41.5MM 錶殼，大細剛剛好，有精鋼同18K粉紅金兩個版本。錶殼側經過緞面打磨，做咗拋光處理，造工相當細緻。錶盤12點位一個細V，中間再加多一個大V形鋼夾板，加強咗豪邁嘅風格，太陽紋射線錶盤同拋光錶殼形成質感上嘅對比。

6點位見到箭嘴標示嘅GMT時間，採用咗一個弧形視窗，24小時制式轉盤，兼有日夜顯示，大V下面、6點箭嘴上面就係第二時區嘅時間。隻錶配搭一隻Automatic Movement，提供到約42小時嘅動力儲存。