朗格去年以Zeitwerk Decimal Minute Repeater 展現出頂尖工藝，用如此技術還原基本步，整返隻簡單雙針腕錶又會變成點呢? 2011年嘅Saxonia 最近強勢回歸，新品 Saxonia Thin 有 37mm、40mm 兩個尺寸，5.9mm纖薄程度令呢個錶款成為全最薄嘅型號。

雅緻雙針錶一向都係西裝友最愛，盤面愈乾淨，隻錶愈顯眼，Saxonia Thin 除咗兩針，就只有棒形小時刻度，同12點位一組朗格標誌，留白範圍非常廣闊。Saxonia Thin 同上一代比較，個棒形小時刻度更為修長，目的係令其更貼近錶圈，銀白色嘅實心錶盤就更為突出。

錶殼有分37mm、40mm兩款，係經典尺寸，唔難carry，質料方面就分成18K白色黃金、18K玫瑰金兩隻，所有版本都係搭載手動上鏈 L093.1機芯。機芯厚度僅有 2.9mm，德國錶嘅格拉蘇蒂3/4夾板、黃金套筒，鵝頸式槓桿微調，麻雀雖小，五臟俱存，提供到約72小時嘅動力儲存。