Hublot : 「英超、歐聯、歐霸、歐國盃，全部都係我嘅人，點同我打呀」，一個鐘錶品牌玩到咁屈機，我都唔知講咩好啦。大家睇波，見到球場大鐘、旁證舉牌、球證睇錶，嗰啲全部都係 Hublot，唔需要覺得出奇，佢地就係勁到包哂嚟做。今年歐國盃2016，Hublot 都出返隻玩逆跳計時嘅特別版 : Big Bang Unico Retrograde Chronograph Euro。

因為主辦國係法國，主色都係用返藍、白、紅，國旗上面象徵自由、平等、博愛嘅3隻顏色，直徑45mm 黑色陶瓷錶殼，配搭「One Click」單鍵替換錶帶裝置，換帶無難度，其實我好鐘意呢個design，你想一錶多襯，換帶真係最佳方法，而市面上啲錶，好多換帶都極麻煩。

隻錶本身跟埋藍色鱷魚皮內襯黑色天然橡膠錶帶，繡以白色、紅色縫線，機芯仍然係自家HUB1261，擁有逆跳時、計時功能，運用於錶盤上化成45分鐘法定時間、加時、補時刻度，上下半場顯示，改動之處相當有心思，好過其他錶只係轉隻色、加個logo 就當特別版。腕錶有約72小時嘅動力儲存。