「掛杯」係指當你搖晃手上嗰杯葡萄酒嘅時候，杯壁上殘留嘅酒痕，而呢啲酒痕會緩緩流下，睇落去就好似眼淚流過面頰，所以又稱「酒淚 Wine Tears」、「酒腿 Wine Legs」。

最專業嘅酒評人都會不時順時針，或逆時針搖晃酒杯，但佢地咁做，只為增加酒液與空氣嘅接觸，令酒香揮發更理想，絕非為觀察酒淚。

掛杯、酒淚之形成係取決於酒精、糖份、甘油等成份嘅含量，都可以簡單地形容，甜味較重，酒體較厚嘅葡萄酒，其掛杯情況會更明顯，酒淚流下嘅速度亦會更慢。

Marangoni effect

但有飲家一味追求掛杯，認為酒淚流動愈慢嘅葡萄酒就係愈靚，品質愈好，呢個講法，充其量只屬個人口味追求，並非品鑑酒質嘅標準。學術界多以「Marangoni effect」解釋掛杯現象，有興趣嘅朋友可以去鑽研一吓。

總括而言，酒淚流動得慢，只代表酒精、糖份、甘油等成份較高，但要品鑑一款葡萄酒嘅優劣，需要考慮嘅要素又雖只呢幾樣呢? 葡萄酒嘅香氣、層次、深度、結構，自身嘅個性，甚至餘韻嘅連貫性，單憑掛杯係睇唔到的。各位飲家品鑑之時，不必多花時間觀察掛杯情況，將心思放於酒香之上，會發現更多！