Huxley 呢個名來自19世紀英國著名生物學家Thomas Henry Huxley，而酒身上面嗰隻Mobsprey，係結合咗蘇格蘭、加拿大、美國三地動物嘅既合成獸，再加上巫術氛圍濃厚嘅宣傳照，一切一切都只為說明Huxley係「三國」威士忌嘅實驗性作品。

官方只肯透露Huxley嘅成份同時有麥芽(Malt)同埋Grain(穀物) whisky，但就無詳細寫明到底來自邊一間酒廠，用咗咩木桶或陳釀咗幾耐，甚至連調和比例都無公佈，所以佢到底係咩味，連估都無得估。

Huxley由Diageo嘅威士忌實驗小組Whiskey Union創製而成，呢個威士忌界嘅神秘組織有個使命 : take whiskey drinkers into uncharted territory，引領威士忌飲家去到未知嘅領域。佢地喺上年11月已經推出咗兩款同樣為「動物」系列嘅作品，第一隻叫Smoky Goat，煙燻山羊，蘇格蘭調和威士忌，混合咗Highland同埋Islay Island獨有嘅煙燻氣息。

而另外一隻叫Boxing Hares，酒標上嘅野兔非常有龍珠破壞神比魯斯嘅影子，呢款作品混和咗蘇格蘭威士忌原液同啤酒花，實屬大膽嘅跨界之作，令啤酒同威士忌嘅界線顯得更為模糊。

由於Smoky Goat同埋Boxing Hares嘅反應都相當唔錯，所以Huxley都會跟住佢地套營銷策略，聽日開始將會喺慕尼黑、維也納、漢堡等歐洲城市嘅Progressive Bars發售，漸漸再擴散去到世界各地。相信不久之後，酒界會有更多關於Huxley風味嘅report，當然親自品嚐先係最準確啦。