嗱我就100%支持健康飲酒嘅 (戴返個頭盔先)，的確，隨著年紀增長，我都好少劈酒，更莫講話劈冧自己，但我一路諗緊嘅都只係自己身體飲到幾多，而唔係應該飲幾多。其實烈酒除咗酒精之外，仲有啲糖份、熱量、卡路里之類嘅營養成份要留意，Johnnie Walker母公司 Diageo 就收集咗1,500名飲家嘅意見，決定將營養成份、飲用方法都寫埋上枝酒度。

Diageo於7月頭頒佈咗一道叫Diageo Consumer Standards (DCIS)嘅聖旨，要求旗下全線產品都加上營養成份表同飲用建議，即係話唔單止JW全線，連Talisker同Lagavulin等single malt都要跟住做。

DICS來自一個Sampling 1,500人嘅調查，受訪飲家表示佢地對於酒液之中嘅酒精、熱量等成份都有不同程度嘅好奇，同時認為糖份等可能引致過敏症狀嘅訊息亦好重要，所以佢地想酒廠簡易明白地列出成份。

結果就係一個以圖像為主嘅營養成份表，雖然圖示會因應發售地區同國家進行調整，但大致上都會保持清晰易睇嘅原則 (驚你班友覺得煩而唔睇)。大家可以見到新加嘅Nutritional Information，入面寫咗大約一杯酒嘅酒精、熱量、卡路里等等，仲圖示標明孕婦、駕駛者就唔好飲啦，寫咗出嚟你照飲，有咩事廠方唔會負責的。

今年年底就會陸陸續續有 Nutritional Information 嘅Red Label上市，去到出年第2季就會擴展到Black、Double Black、Gold、Platinum等Johnnie Walker嘅產品之上。