嚟到科技發達嘅2021年，無論係叫外賣、購物、Call車、餐廳訂位都可以透過網上預約，為順應時代發展，近年中國一個賣淫集團就用Call車App「滴滴出行」做包裝，為用戶提供特別預約服務。只要撳開個山寨版「滴滴」，入面就會出現「附近好車」、「驗車報告」、「上車」等字眼，當然此車不到彼車，全部都係掩飾技巧。目前公安已拘捕255名涉案人士，案件仍進一步調查中。唔知香港會唔會有不法份子仿效整個山寨「Uber」呢？

綜合中國媒體報導，早於2020年12月，廣東汕頭市公安檢查一名嫌疑犯手機時，發現一款仿照「滴滴出行」嘅境外非法App「x滴滴」，入面充滿各種網絡招嫖內容。經公安調查後發現，呢個App背後有組織咁聯合當地多家娛樂場所酒水銷售經理，並透過層層介紹關係，以線上線下形式招嫖賣淫。

經營者收到「訂單」後，就會喺群內向賣淫婦女「派單」。

酒水銷售經理負責介紹嫖客，而經營團隊就透過境內即時通訊App對賣淫婦女進行組織化管理，每當收到訂單時，就會即時喺群內「派單」。另外，有人更長期租用公寓當作「上車地點」，一邊收介紹費，一邊賺房租。經過公安長達半年調查，目前已拘捕255名疑犯，案件仍有待進一步調查。