學九把刀話齋︰「人生就是不停的戰鬥！」所以打機有理，同兄弟對打激鬥更加合情合理！不過有贏就會有輸，輸咗咁樣衰畀Friend笑，點可以咁順攤認低威︰「妖！我未認真啫！」、「頂你！個手掣『神神』地喎！」、「頭先Lag機唔算！再嚟！」哦！一定係咁啦！一定唔係你唔夠人打啦！老老實實，仲有咩藉口先？即管繼續吹～外國網站Arcade Sushi就列出《打機輸咗時嘅藉口》，唔夠貨搵落台楷？睇吓仲有邊句啱用囉～

「呢隻根本係爛Game！」
究竟係爛Game定係你駕馭唔到隻Game先？唔好因為自己玩極都輸就怪隻Game︰「都是你的錯……」喎。

「你Chok埋啲咁嘅（我唔知道嘅）秘技咁L矛嘅！」
Come on James！秘技就係畀人用嚟屈機架啦！冇得賴架喎，唔「Gur」呀？你都學返一招半式囉。

「我家吓先嚟真！」
係係係，頭先打咗幾個鐘你都只係Warm Up啫，明嘅明嘅。

「個畫質勁差勁難睇囉！」
畫質咁差咁難睇，你個Friend點解又會睇得咁順仲贏埋你呢？可～？

「頭先Lag咗機，再嚟過！」
雖然Lag機的確係經常會發生，但聽講10個玩家有8個打緊機嘅時候，都冇Lag機。

「我用唔慣呢個角色！」
明嘅，有時用啲用唔慣嘅角色，係冇辦法發揮100%水準，不過輸咗就要認，男人嚟架嘛！

「哎呀！我啱啱分咗心！」
呢招最好就係一班人打機嘅時候用，如果有人出聲講嘢，輸咗都可以賴係因為佢令你分心。

「個手掣『神神』地！」
呢個一定係打機輸咗嘅藉口之冠，係真定假，心照啦巴打。