正所謂「Rome wasn't built in a day（羅馬不是一天建成的）」，奧運金牌亦都一樣，大部份企喺頒獎台嘅選手都係經過屢次失敗與挫折，先有今時今日嘅成就。今日介紹嘅體操選手Marina González，年僅18歲就代表西班牙出戰今屆奧運，雖然成績未如理想，未能擠身決賽，但相信佢吸收經驗後可以力爭巴黎奧運獎牌。

今年18歲嘅Marina González，6個月大已經學游水，游到3歲先開始轉學跆拳道同田徑，10歲都未夠就獲得當地跆拳道錦標賽冠軍。直到8歲嗰年先專注訓練體操，歷年嚟參加過各種大大小小嘅比賽，2017年正式加入西班牙國家隊。曾經喺2019年及2020年西班牙全國錦標賽獲得女子體操全能銀牌及銅牌，年紀細細就咁好成績，自不然獲得奧運參賽資格。

雖然Marina González今屆奧運所出戰嘅女子全能、女子高低槓、女子平衡木、女子自由體操、女子團體賽全部落空，但相信佢今次旅程所吸收嘅經驗，能為下屆奧運造就更好嘅成績。