一個女人嘅身材發展受到好多因素影響，例如佢嘅成長環境呀、生活習慣呀、飲食營養呀，當然家族遺傳都係一個重要因素。而今晚要介紹嘅呢位「細川愛倫」，就係出身自一個日本知名嘅「好波」世家——咩話？你話睇相又唔覺得佢遺傳到家族嘅「好波」基因？咁你就可能誤會啦，因為佢屋企好波嘅唔係佢本人，亦（應該）唔係佢媽媽，而係佢老豆呀！

咁我又唔係話呀Uncle上圍好豐滿，而係因為「細川愛倫」嘅爸爸「細川亨」其實係一名曾經參加日本職棒嘅捕手，2020年引退之後仲做埋教練，目前執教緊福岡球隊軟銀老鷹（Softbank Hawks）。而現年21歲嘅「細川愛倫」就係挾住「棒球名將」之後嘅身份，於去年10月正式出道加入日本藝能界。去年佢仲有機會為爸爸執教嘅球隊比賽擔任開球嘉賓，細川亨仲親自上陣為阿女做捕手，於棒球場上映一場溫馨一幕添。

但即使撇除「球二代」身份，「細川愛倫」本身亦係值得大家期待嘅。首先佢的確有遺傳到爸爸嘅運動員身材，166cm高於日本黎講算係頗為高挑；一雙明亮大眼睛配上燦爛笑容亦的確非常陽光可愛。至於未來能否更進一步，或者就要睇佢自己嘅「球技」啦。

IG：airin_hosokawa