唔少打工仔每逢放假就唔願意離開自己張床，希望瞓得幾耐得幾耐，儘量中和一下過去一週日日返工嘅辛酸。而今晚要介紹嘅呢位「あらた唯」雖然唔係打工仔，但佢同大家一樣都非常沉迷「床上生活」——唔係咩成人話題呀，係真係賴喺張床上咩都唔做嘅生活呀！

10月就28歲嘅「あらた唯」，高中之後去咗讀護士學校，畢業後亦真係去過醫院工作，但2020年一次偶然於原宿街頭被星探發掘之後，佢就搖身一變成為模特兒兼賽車女郎。當年更因為係史上首個同時於Super GT、Super耐久及Super Formula三大賽車比賽同時出道嘅新人賽車女郎而廣受注目，旋即成為賽車界風雲人物。隨後佢就挾人氣踏足寫真界，仲於2022年贏到扶桑社舉行嘅「Miss SPA!」寫真選美比賽總冠軍添！

雖然工作同運動有關，睇身型又似乎有做開運動、讀書時亦真係打過下排球，但其實「あらた唯」最大嗜好就係留喺床上面咩都唔做。而且據佢日前於電視節目上透露，放假時佢會於床邊放好哂水呀、嘢食呀、護膚品之類日用品，之後除非要去廁所又或者準備出門，否則佢係絕對唔會離開張床。甚至因為覺得自己根本就冇郁過唔會出汗，所以連涼都唔沖，淨係用濕紙巾抹下個頭就算。雖然話佢算係人靚身材正啫，但唔知各位又接唔接受到佢呢種生活習慣呢？

IG：arata_yui_