《魔戒電影三部曲》及《哈比人電影系列》導演Peter Jackson已經超過10年再冇執導劇情長片，對上一部已經係2014年上映嘅《哈比人：五軍之戰（The Hobbit: The Battle of the Five Armies）》，然後就轉咗去拍紀錄片，交出《They Shall Not Grow Old》及《The Beatles: Get Back》兩部作品。佢最近接受訪問時就透露，自己完全未打算退休，目前手頭上亦有三個劇本正撰寫當中，同時仲積極參與復活已滅絕嘅巨型恐鳥（Giant Moa）項目。

Peter Jackson日前接受外媒《Screen Rant》訪問，被問到多年冇拍長片係咪已經退休時，佢就表示：「唔係，唔係。我當然未退休，我目前正寫緊三個唔同嘅劇本。其中一部係《魔戒》系列新作《The Hunt for Gollum》，將由Andy Serkis（「咕嚕」配音員）親自執導，預計明年開拍。」不過，佢就未有透過另外兩個劇本細節。另外，佢亦提到自己非常享受拍攝紀錄片，好鍾意《The Beatles: Get Back》呢個計劃，享受同The Beatles合作嘅各種企劃，未來應該會繼續合作落去。

除咗影視工作，最近Peter Jackson仲同生物科技公司Colossal Biosciences執行長Ben Lamm，以及考古學家Kyle Davis合作，致力復活已滅絕嘅巨型恐鳥（Giant Moa）。佢更向記者表示：「對我嚟講，將巨型恐鳥復活真係比拍任何電影都刺激。我拍過好多電影，但如果能夠見到巨型恐鳥復活，我認為嗰種興奮感會超越任何情事。」

據報導，Colossal Biosciences將使用Peter Jackson及其合夥人Fran Walsh提供嘅1,500萬美元資金（約1.17億港元），嘗試對現存鳥類進行基因改造，重現出已滅絕嘅南島巨型恐鳥（最高可達3.6米）。要完成呢個目標，研究員需要從化石中提取DNA，再搵出基因序列最相似嘅現存動物，接著透過基因編輯技術創造出類似嘅物種。此前，Colossal已經透過基因編輯成功「復活」出恐狼。