食詐糊？御伽ねこむ嫁唔成？

POSTED ON 05 Jul 2016

有人話戲如人生，又有人話人生如戲，有時聽到啲現實中發生嘅故仔，真係好睇過戲。就例如上個星期我同大家介紹過J Cup Cosplayer兼寫真女星御伽ねこむ被大佢31年嘅《幸運女神》作家藤島康介搞大咗個肚，仲話會結婚做媽媽級Cosplayer。正當你葡萄緊佢個小朋友第時可以食到有幾飽嘅同時，劇情竟然黎個360度轉變——貌似藤島康介冇諗住上身！

日本傳媒早幾日大肆報導呢單新聞，當中最主要嘅情報係來自御伽ねこむ喺Twitter上嘅聲明。不過有網民就發現事件中嘅另一位主角藤島康介就咩都冇講過——係近呢大半個月咩都冇講過。而最吊詭嘅就係藤島康介本身係一個重度Twitter用家，有網民做過紀錄，截止6月15日，藤島每日都喺Twitter發佈幾十個Post，多起上黎仲有成八十幾個。但由16日開始到2號，就只有一個「要努力畫原稿」嘅Post，就連御伽ねこむ公佈會結婚、Facebook名都改埋做「藤島美都輝(真名為奥山美都輝)」，藤島本人都係冇聲冇氣。反常情況就引起網民猜測。

據知，原來當藤島知道御伽有咗之後，的確曾經講過會「負責任」，御伽就理解成會結婚，於是向事務所同公眾公佈。但其實藤島所指嘅負責大概只係金錢上嘅支持，而非真正「負責任」。而根本嘅原因，就係藤島本身都唔係啲咩純情小生黎。佢同太太表面上已經離婚，但其實未正式做離婚手續，因為假如正式離婚，藤島就要被人分身家。而佢目前仲同一位女友同居，仲曾經光明正大帶佢出席聚會，所以御伽嚴格上係「小四」黎！

事情發展到咁，相信都唔會係大團圓結局。而御伽當日喺Twitter上宣佈結婚嘅貼文亦都已經被Delete咗。究竟最後會點收科？係咪好睇過戲呢？