1. 唔抵得女朋友成功！

原文係「Insecurity(冇安全感)」同「Competitiveness(好勝)」，用中文黎講就係一個比較複雜嘅概念。具體啲就即係將對方嘅成功視為對自己嘅威脅，硬係要表現自己係叻過女朋友，於是當女朋友成功時就會打壓佢、有機會亦會跺低佢抬高自己。但先唔好講一個男人應該要對自己有自信，唔需要不停同其他人比較；淨係講如果女朋友有所成就，一個男人都應該係為佢感到自豪而非自卑！而且就算真係自己做得唔好，佢都應該可以接受批評同改進！

2. 不能表達自己

塵世間有幾多情侶嘅分手原因係「溝通唔到」？咁究竟咩係「溝通」先？Askmen就話最重要係誠實同打開心防：喜愛的說喜愛、討厭的說討厭。如果你覺得佢靚就坦白話佢知(但如果你覺得佢唔靚就千祁唔好講出口)，唔愛佢嘅亦唔好下巴輕輕講「我愛你」。而且，唔少男人都好唔習慣講出自己嘅心底話，尤其係關於情緒話題，但作為一個男人就係要學識面對呢啲情緒！

3. 懶醒

有啲男人好鍾意用一個自己知道哂世上全部嘢嘅語氣黎同人溝通，無論人家講啲咩，佢都有辦法「糾正」人家，再用自己嘅意見強姦你。將心比己，有邊個鍾意同一個不停認叻嘅人(例如某百祥)傾計？一個男人應該要以平等嘅態度對待所有人，而且亦都有器量去承認自己唔係樣樣嘢都識。

4. 過份睇樣

黃子華講過，後生嘅時候佢唔識嘢，以為女朋友靚就得，到大個先知知身材其實都好重要。講笑就咁講，但作為男人除咗要識得欣賞女人嘅外表，更要學懂欣賞佢嘅不完美。我哋要明白所謂「靚」，唔係只有一種定義；而且「不完美」，先係令到每個女人與別不同嘅重點。

5. 猶豫不決

簡單啲，婆媽。點解人會猶豫不決？係因為我哋唔知道自己究竟想要啲咩，冇目標，自然就唔知條路點行。換成與女人嘅相處，男仔可能連呢個女仔啱唔啱自己都唔知，所以佢無辦法決定自己應該去馬，定係收皮。男人清楚知道自己想要一個點樣嘅伴侶，所以亦會知道點樣同呢啲女人相處，而唔係谷下腦地想推人落床。

6. 人云亦云

男人應該要有自己嘅價值觀，而根據呢個價值觀，亦會有相對嘅行為。但如果你連自己嘅價值觀都無辦法確立，當身邊有人，尤其係朋友提出相反意見嘅時候，就會表現得搖擺不定。你知呢個世界有幾多口痕友，可能會對你選擇嘅伴侶嘰嘰咭咭，如果你唔夠堅定，可能就會被呢啲「輿論壓力」影響到自己嘅決定。

7. 冇諗過將來

圖片：開片Open Video - 潮文映画系列《Come On James》

呢句嘢又係「女方提出分手嘅十大理由」之一。好多「男仔」都唔明，究竟點先算「諗過將來」呢？其實講到尾都係「目標」同「計劃」嘅問題。例如你好想去現場睇一次巴塞(目標)，你都識得搵下點買飛、點搭車(計劃)啦下話？套落男女關係都係一樣，如果你知道自己嘅目標關係係點嘅，自然就會有相應嘅計畫，而唔係見步行步，過得一日得一日啦。

以上就係Askmen列出嘅「七大男人不該做的事」，唔知你又同唔同意呢？

Askmen