Cobo House原本於石塘咀嘅舊店結業後，新店進駐同樣以藝術為主題嘅K11 Musea 6樓。新店有超過50個座位，坐擁維港海景，並設有「外帶用餐Grab&Go」、「餐飲美食 GourmetDining」和「酒吧小酌 Bar」三種用餐選擇。而食物就搵黎兩位富有國際經驗嘅本地廚師Ray Choi 蔡韶殷 以 及 Devon Hou 侯煒妍擔仼行政總廚，並創出每份菜單限定供應6個星期嘅「神秘菜單──餐刀與湯匙系列」。

兩位主廚都係土生土長香港人，其後亦各自於Mandarin Grill + Bar、L’Atelier de Joël Robuchon、Amber、Arbor與Tate Dining Room等米芝蓮餐廳工作。雖然已經多次合作，但二人性格截然不同，Ray係內向而Devon外向。而「神秘菜單──餐刀與湯匙系列」亦係象徵兩位主廚有如餐刀與湯匙一樣南轅北轍，但合作無間。

而「餐刀與湯匙系列」總共會有九個「章節」，每個章節使用一種食材為主題，提供兩位主廚精心創出嘅六或八道菜。例如「序幕」嘅開胃菜就係Chef Ray擅長嘅日本鯛魚刺身，用昆布醃製後配上車厘茄秘製醬汁，再加指橙及日本酸薑，鮮甜不膩、齒頰留香。

而「序幕」另一道菜「奶油北海道厚岸拌希靈魚籽及三文魚籽」，就係由幾個月前Chef Devon研究白奶油醬汁時，Chef Ray建議配上慢煮日本蠔──北海道厚岸而啟發，再經多次試驗及改良而成。甜品就以日本山梨縣白桃、白米味泡芙，配上兩位主廚最愛的紫蘇雪糕，為COBOHOUSE的序幕劃上句號。

據知「序幕」後嘅第一章會以蛋為主題，當中包括皮蛋，以及睇個名都已經好吸引嘅「醬油鴨蛋黃配日本赤鮑意大利飯」。

除咗嘢食吸引之外，Cobo House嘅環境都非常舒適。水泥色系裝潢，配上由舊址搬黎嘅餐廳傢具，充滿簡約現代風格。大家亦可以留意餐廳內展出嘅藝術品，當中包括多位世界級藝術家嘅作品，令格調更上一層樓。

Cobo House

香港尖沙咀梳士巴利道18號K11MUSEA6樓602舖

營業時間：星期一至星期日：11:00AM-11:00PM

電話：+8522656-3088