如果你住香港區，咁今次介紹嘅青衣美食城就未必啱你。當然，你話你有車，世伯伯母開油站，成日身痕周圍兜，搜刮邊區有好嘢食就另計。

星期一，本來最無mood諗吓去邊度玩。Mean娜都幾反對呢種消極派，梗係最down嗰日plan定星期五去邊度食嘢去邊度玩啦，唔通到星期五下午先WhatsApp人哋去街，口窒窒又冇噱頭冇idea咩。

Happy Friday，梗要玩到夜一夜先返歸。平時同朋友去旺角、大角咀食宵夜，係呀，啲舖頭開得好夜，但唔集中。食得串燒又食唔到糖水，要食糖水又要行到街尾，鬼咁麻煩，幾個路口，截的士又唔係，行就更加無理由。

轉吓新場囉，要喪飲喪食，想懷愐讀書年代「掃街樂」，唔一定去MK或SSP，青衣都可以，仲係24小時營業！

「青衣多美食」，呢句話只會係葵青荃灣深井人先會明白。區外人對青衣食肆的印象，好可能仲停留喺90年代初，被稱為「屋邨無牌熟食小販天堂」的年代。

90年代初，青衣長發商場對出空地，一直係無牌熟食小販的領域，全盛時期共有三、四十檔小販聚集，甚至延伸至各屋邨，規模之大，在香港一時無倆，電視台固然有採訪，聞說當年的房屋署長都「微服出巡」坐住AM車落區視察。由於小販「阻街」，衛生欠佳，食物環境衛生署多次掃蕩，無牌熟食小販逐漸被打擊，最終捲蓆收皮。

N年前那塊空地，現已變成全港少有的通宵美食城。

青衣美食城的好處，不單止24小時營業咁簡單，食物仲好多選擇。

有涼茶舖，捱夜食宵夜前，最啱飲返碗，清熱氣，打定底。

有碗仔翅、生菜魚肉等等，連日式章魚小丸子都有。

煎釀三寶算是港人最愛之一，Mean娜試過兩次半夜幫襯過，都啱啱遇著「出爐」，熱辣辣，好正。

一入長發商場，見到OK便利店，自問未夠皮，要吔埋雪糕先心息都得，再唔係買啲啤酒同friend番歸再啤，正呀！

成個美食城咁大，有咩好介紹先？等Mean娜話你知啦！

首先，喺美食城買食物，除了涼茶舖，其他都要在售票處落Order買飛，再到舖頭領取食物。

Mean娜大力推薦串燒店！一來出面較少見，二來「串宵」一店的食物質素確係唔錯。

識食「8度半」，一定會叫炸薯條。這裡的炸薯條出奇地香脆，而且可以加辣粉或紫菜，香口惹味，不過採訪當天，「8度半」換了另一種粗身薯條，口感比原來的幼身薯條欠佳。

揸車嚟，記住︰

1.長發商場設有停車場，揸車人士入來食宵夜，其實好方便就腳，九龍入嚟行三號幹線，近荔景沿左落荃灣路，靠左上青衣北橋，落橋迴旋處睇指示。

2.提提你，有泊車優惠：逢星期一至日，早上10時至晚上9時半（以入車時間計算），憑商場發票1張或不多於街市發票3張，購物消費滿$200或以上，即可享有1小時免費泊車優惠。