鰂魚涌37樓空中靚景Food court

文：MenClub Mean娜　　圖：MenClub
POSTED ON 18 Sep 2015

平時喺鰂魚涌食Lunch，嚟嚟去去都係濱海街、海光街、太古城一帶，唔悶咩？咪話男人老狗，食個Lunch使乜煩，是是但但咪得囉！喂！做人要講生活態度，有時個人頹頹地，都想搵個地方好好享受餐飯Relax下。就算你唔係喺鰂魚涌返工，家下交通咁方便，港島區嗰頭搭程車過去，有幾煩丫？嗱，作為打工仔，有時仲有一日半日假要清，懶得放假就咪去附近茶記食叉雞飯喇，不如試吓去鰂魚涌港島東中心 37 樓嘅靚景Food court食晏，咪幾梳乎。港島東中心 37 樓機門一開，就見到成片落地大玻璃，而出面就係一片大海，呢度就係空中Food court「Public」。


落地玻璃由升降機前一直連去「Public」Food court，沿路放滿枱枱凳凳畀顧客坐低慢慢食飯，闊落嘅環境加上一整排玻璃，望住天空食飯，真係有種去咗機場Ready離港嘅感覺。

升降機轉角處，就會見到大大個「Public」嘅牌，入面就係買食物嘅地方。太古集團旗下嘅「Public」，足足有8000呎咁大，平日主要多港島東中心返工嘅人上去食飯，不過地方咁靚，都吸引好多大樓以外嘅上班族過嚟。
「Public」Food court係自助快餐形式，你眼見有咩啱食，埋去同店員講聲，佢就會遞畀你，請你拎去收銀處付款。不過呢度營業時間只係閒日嘅上午7點到下午6點，Mena娜一心諗住避開Lunch Time人潮，所以3、4點先去到，點知就周圍都吉晒，冇咩嘢食淨，所以巴打有意去食嘅話，真係要早少少去到喇。

有別於一般Food court，「Public」Food court感覺更似一間大型Cafe，所以貨品都擺放得井井有條，而且格局設計高雅，仲有好多外國食品。

好似呢幾個木箱就放滿外國嘅薯片

雪櫃亦放滿各種飲品

仲有不同種類嘅酒，有啤酒、香檳等等

最威威係連紅酒、白酒都有賣！你話邊有Food Court會賣紅酒丫？

除咗食物同飲品之外，裡面亦會售賣靚靚餐具，行經過見到隻杯幾靚，咪買個返Office飲水囉。

悶悶地，仲有個足球機畀你同同事過吓手癮，話時話，讀書時代以後，你有幾耐冇玩過足球機呢？

講咗咁耐，肚餓未？Mean娜就開始買嘢食喇，個蛋糕睇落好吸引咁，不如試返個？

Mean娜分別買咗︰Chili Crumble Mac n' Cheese $65 Cajun Roasted Chicken With Potato Gartin $80 Lemon Meringue Tart $20

Chili Crumble Mac n' Cheese $65 芝士味道雖然唔算濃，可能令芝士迷失望，但入口尚算Creamy。通粉亦煮得夠軟身，同芝士口感配合得宜。

Cajun Roasted Chicken With Potato Gartin $80 雞肉嫩滑，烤得亦夠香；千層薯仔醃得夠味亦充滿口感。

Lemon Meringue Tart $20 上面是檸檬味蛋白霜，味道頗甜卻不失檸檬清香，下面是檸檬餡餅，入口較酸，進食時建議不要分開兩層，要同時將蛋白霜及檸檬餡餅放入口，味道才最Perfect。

PUBLIC 地址：鰂魚涌華蘭路 18 號港島東中心 37 樓電話：2784 7900 營業時間：星期一至五 7am-7pm（Public），7am-6pm（Deli ），逢星期六、日休息