【最強世界第一】費達拿將再度參戰法網？！

文：MenClub 波特先生　　圖：互聯網
POSTED ON 07 Mar 2018


現年36歲嘅「瑞士天王」費達拿，喺今年2月16日相隔超過5年後再次重返世界第一，而佢較早前亦率先奪得澳洲網球公開賽嘅冠軍，狀態可以話係一時無兩。

而日前，呢位世界一哥就表態指自己將好大機會再次參加今年度嘅法國網球公開賽，因為佢好想第二次奪得呢項大滿貫錦標。作為大滿貫20冠嘅得主，費達拿生涯就只曾喺2009年奪得過1次法網冠軍，當時佢喺決賽擊敗嘅係瑞典球手羅賓蘇達寧。

不過由於費達拿一直唔係主攻泥地賽，再加上佢嘅宿敵拿度又正正係「泥地王」，所以過去13年拿度一共奪得10次法網冠軍，而費達拿喺決賽上輸比拿度亦多達4次。而2016年費達拿因為受傷而無參加法網，去年佢則因為留力衝其他大滿貫參事而放棄左法網，所以今年佢捲土重來絕對係球迷之福。

另外，目前對費達拿黎講最大威脅嘅拿度已經相繼退出阿卡普爾科、印第安維爾斯及邁阿密嘅比賽，以咁樣嘅情況推斷，拿度喺月5月份究竟有無足夠狀態出戰法網則成為懸念。而如果費達拿無左拿度呢位最大對手，相信佢生涯入面再奪法網嘅機會再會大增。

除此之外，費達拿喺接落黎嘅印第安維爾斯賽事入面都要盡全力晉級至奪冠，因為咁樣先可以進一步鞏固佢世界第一嘅寶座，雖然對於佢黎講世界第一呢個銜頭其實已唔係最重要了。