NBA近期最大嘅交易消息，就係速龍與馬刺進行左一宗巨星級別嘅交易，其中2014年總決賽MVP Kawhi Leonard連同3D球員Danny Green被交易至速龍隊，而速龍則送出核心DeMar DeRozan、Jakob Poeltl及一個受保護嘅2019年首輪籤比馬刺。

Leonard作為馬刺自三頭馬車之後嘅第一核心，因為傷病問題同球隊引發矛盾，最終被交易已屬意料之內，只係勢估唔到交易嘅另一邊竟然係速龍嘅DeRozan。

今次速龍與馬刺交易，外界都批評速龍管理層無情，甚至係出爾反爾，因為DeRozan作為球隊嘅首席球星，佢帶領球隊打出過隊史最佳戰績，又曾4度成為全明星球員，係球隊嘅代表人物。而喺今年嘅夏季聯賽期間，管理層亦曾對佢承諾絕對唔會交易佢，點知最終竟然一個「屈尾十」就為左得到Leonard將佢交易掉。

對於速龍嘅做法，DeRozan感到非常難受，因為佢一心為球隊付出9年，當中無論經歷幾多低谷打擊，佢都無放棄球隊，同球隊一齊捱過去，但球隊最終卻輕易將佢送走，令人反思球隊就要球員絕對忠誠，但當球隊要放棄球員就可以無視當初嘅忠誠，咁球員選擇離去又點解要考慮忠誠呢？

作為曾經速龍嘅一員，Lou Williams就直指速龍隊咁樣對待DeRozan有如毒蛇一樣卑劣，而DeMarre Carroll及Terrence Ross則覺得速龍隊應該為DeRozan立一個雕像，因為佢嘅表現及成就絕對配得上。

另外，有NBA記者亦一語道破，先有Isaiah Thomas被塞爾特人交易以換取Kyrie Irving，後有速龍以DeRozan換取Leonard，但同時你要求Kevin Durant留喺雷霆保持忠誠，呢種想法實在難以令人理解。

始終NBA就係一門生意，所有都係商業決定，係為左球隊及個人利益出發，所以球隊交易球員以換取最大利益絕對係合情合理，但同時球員作任何決定亦只係由自身利益出發，亦都非常合理的，而選擇強隊加盟抱大腿則係骨氣問題，呢度就唔多講啦。