《EVA》劇場版黎啦！官方PV現身上映日期確定

文：MenClub 魏文青　　
POSTED ON 23 Jul 2018

《新世紀福音戰士(EVA)》早年推出《序》、《破》、《Q》三套新劇場版，數一數《序》已經係11年前(2007年)嘅作品，但傳聞中嘅最終話《劇場版:\|▌》(唔好問我點讀)一直都未見影，搞到唔少人都認定佢會爛尾——直到呢幾日終於有新情報公開啦！

卻說由上週末開始，日本電影院喺播放正片之前播出《EVA》嘅全新預告。預告只有10秒左右，內容係真希波駕駛改裝過嘅8號機於血海上掃射，最後出現「2020年上映」嘅字幕，配合6月時有人發現製作團隊Khara工作室開始招募動畫師等人手，又於Twitter公佈咗預告出現嘅8號機設定圖，證明最終回應該真係製作當中啦！

另外亦有人指呢套「最終回」其實唔係「最終」。最終話標題中嘅「\|▌」係音樂中嘅終止符號，但配埋前面個冒號「:\|▌」，就變成重覆符號，另外仲有人話「\|▌」亦可以解釋成「旧(舊)」，咁有舊即係有新啦？有新就即係仲有啦？仲有即係仲要等啦？好我就等你！