琴日就同大家睇過《Marvel》宇宙嘅劇集《WandaVision》預告，而再早前亦同大家報導過，如果根據原定計劃，《WandaVision》應該係電影《Black Widow》及另一劇集《The Falcon and The Winter Soldier》之後播放嘅，而近日Disney就正式公佈，《The Falcon and The Winter Soldier》會延至2021年播放。

Disney最新於Disney Plus新增《The Falcon and The Winter Soldier》頁面，並注明係2021年播放，但就冇詳細講係2021年幾時。《The Falcon and The Winter Soldier》本來預定今年8月播放，但由於疫情影響令拍攝工作暫停咗幾個月，到九月初先再次開始，理所當然地冇辦法趕及今年播放。

而根據美國Disney Plus上嘅劇情簡介 ，《The Falcon and The Winter Soldier》係講述「Falcon」Sam Wilson (Anthony Mackie飾) 及 「Winter Soldier」Bucky Barnes (Sebastian Stan飾) 於《Endgame》之後，走篇全球「測試他們的能力」。據估計，劇集係為咗鋪排「Captain America」Steve Rogers (Chris Evans飾) 離開後，由邊個繼承「Captain America」嘅位置。漫畫原作中，就係由Falcon接替。