PS5已經於香港開賣咗個幾月，大家買到機未？相信個答案應該都係「未」。咁假如你係想買、但又未買，而且對於PS5嘅白色主機加白色手掣唔多滿意、兼唔介意使多少少錢嘅話，咁由SUP3R5推出嘅呢部改裝版PS5套裝就應該啱哂你！

圖片：SUP3R5

睇睇佢呢個全黑機身、仲有個四色PS標誌，有冇覺得好熟口面？緊係熟啦，因為據SUP3R5講，佢哋推出嘅呢部改裝PS5係以PS2為主題。佢哋先將PS5主機嘅兩塊白色面板拆除，再人手將佢變做啞黑色，而Dual Sense手掣更加係成個拆開重新上色，砌返埋之後就痴返個舊PS標誌上去，就成為咗呢部限量304部、8號接受預訂嘅改裝版PS5。

圖片：SUP3R5

不過要擁有呢部咁型仔嘅PS5都會付出些少代價，首先係價錢方面，改裝過嘅下載版要649美金 (約$HK5,000)、光碟版749美金 (約$HK5,800)，比起正常零售價貴250蚊美金 (約$HK1,950)，即係半部機嘅價錢。其次係因為改裝過程中要成個Dual Sense手掣拆散，所以就冇咗原廠保養。如果純粹係貪個樣，可以選擇淨係買個手掣，99美金啫。

資料來源：SUP3R5