丼飯係唔少人嘅至愛，滿滿嘅餸放喺珍珠米上面，實在係正。而較早前丼丼屋就於內部進行員工「丼丼屋丼物對決賽」，最終有兩個丼飯成功脫穎而出，獲公司為佢地設計嘅全新丼飯推出市面。

今次內部員工進行創意大對決，比賽得獎嘅作品分別係：金賞「廣島蠔天丼」以及銀賞「大阪燒風親子丼」，呢兩個得獎丼飯都會於香港各大分店食到。

其中銀賞「大阪燒風親子丼」已經登場，其創作靈感源於日本大阪人氣名物「大阪燒」，面層鋪上以日本北海道特選3.6牛乳烹調嘅日式滑蛋，再淋上大阪燒汁及沙律醬後再灑上「大阪燒」經典海苔粉及木魚花；而飯入面則更加入粒粒照燒雞肉及多種菇類，包括冬菇、杏鮑菇及本菇等炮製，每一啖都絕對大滿足。

而金賞「廣島蠔天丼」則於7月頭同大家見面，丼飯嚴選多款鮮甜海鮮入饌，包括廣島縣產牡蠣、甜蝦及小貝柱，配上南瓜及洋蔥。以上每款食材都會經高溫油炸成金黃鬆脆嘅天婦羅，外脆內甜。丼飯更特意配上人氣大熱嘅炸芫茜，絕對係一班芫茜迷唔可以錯過嘅選擇！