隨住備受爭議嘅Marvel新作《尚氣與十環幫傳奇》將於9月3日上映，今日官方公開最新預告揭露更多劇情，不過今次重點就唔係飾演主角尚氣嘅劉思慕，而係「文武/滿大人」梁朝偉，見到偉仔大晒英文能力之餘，亦首次展露「十環」之力（點解我會諗起《功夫》嘅洪家鐵線拳...），大家熟悉嘅陳法拉亦正式登場。

從今次預告入面可以知道，尚氣（劉思慕飾）自細就喺陰影下長大，認為爸爸文武（梁朝偉飾）係殺人犯，大個後就選擇離開十環幫隱姓埋名展開新生活，但文武就帶領手下不停「搵仔」，最終兩父子都要大打一場一決勝負。

預告亦解開陳法拉嘅身世之迷，原來佢喺劇中飾演文武老婆，亦即係尚氣媽媽。而馬來西亞著名演員楊紫瓊就好似係扮演尚氣嘅師傅。

除咗見到梁朝偉型爆咁不停展示「十環」之力，預告片最後都有一個彩蛋，就係《The Incredible Hulk（新變形俠醫）》入面反派「Abomination（惡煞）」出現喺擂台上。